YAP-ın əməkdaşları marşrutsuz qalıb – SÜRÜŞMƏYƏ GÖRƏ

Paytaxtın Bibiheybət məscidi yaxınlığından keçən magistral yolun çökməsi həmin istiqamətdə yaşayan sakinləri marşrutsuz qoyub.

Pravda.az-ın xəbərinə görə, artıq 3 gündür ki, ictimai nəqliyyatdan istifadə edə bilməyən jurnalist binalarının sakinləri mətbuat vasitəsilə Bakı Nəqliyyat Agentliyinə (BNA) müraciət ünvanlayıblar.

Müraciətdə bildirilir ki, Səbail rayonu Yeni Salyan yolu 22-də yaşayan 410 mənzildən ibarət “Jurnalist binaları”nın, həmçinin həmin küçədə Yeni Azərbaycan Partiyasının əməkdaşlarının da yaşadıqları “Kristal Abşeron” binalarının sakinləri Bibiheybət yolundakı sürüşmə və aşınmadan sonra, yaşadıqları ərazidən keçən yeganə marşrut olan 125 saylı avtobusdan istifadə edə bilmirlər: “Adı çəkilən binaların sakinləri adından Bakı Nəqliyyat Agentliyinə müraciət edərək bildirmək istəyirik ki, aramızda yaşayanların çoxluğunun şəxsi avtomoili yoxdur. Bina sakinlərinin övladları buradakı dayanacaqdan istifadə etməklə məktəbə gedib-gəlirdilər. Bundan başqa həm də sakinlərin arasında yaşlı adamlar var ki, onlar da daim avtobus xidmətindən istifadə edirlər. 6 ay bundan əvvəl çəkilən Bayıl yamacındakı yolun uçması səbəbindən bizim ərazidə yaşayan sakinlər yenə də əlacsız vəziyyətdə qalıblar. Hər səhər işə gedən insanlar 20-ci sahədən yola çıxmalı olurlar. Marşrutların sıxlığı səbəbindən iş yerlərinə vaxtında çatmırlar. Bununla da işlədikləri yerdə əmək haqqlarında azalma olur. Səhər işə gedib, axşam evə qayıdanda isə havanın qaranlıq olması səbəbindən, eləcə də 20-ci sahədə yay aylarından başlanan qazıntı və su kanalizasiya işlərinin bu günə qədər uzadılması səbəbindən yollarda keçilməz xəndəklər əmələ gəlib. Gecələr görmə qabiliyyəti zəif olanların bu yolda ayaqları büdrəyərək yıxılmaq ehtimalı böyükdür. Həmin yolların palçığı, gecənin qaranlığında yollardakı sahibsiz itlərin gəzişməsi, naməlum insanların təhlükəsi baxımından da qaranlıq küçələrlə böyük bir yolu “Jurnalist binaları”na qədər qət etmək təhlükə yaradır. Hamıya məlumdur ki, 20-ci sahədə də kriminala meyilli insanlar yox deyillər. Onların hücümuna məruz qalmamaq üçün, “Jurnalist binaları”nın sakinləri BNA-ya müraciət edərək, xahiş edir ki, təcili surətdə bizim yaşadığımız əraziyə marşrut təyin edilsin. Həmin marşrut Ali Neft Məktəbinin yanına gedib, arxa yol ilə 20-ci sahədən dönə bilər”.

Jurnalistlərin müraciətində o da qeyd olunub ki, təkcə 125 saylı marşrutla bina sakinlərinin yol problemi həll olunmur: “Buraya ən azı 2 marşrut xətti buraxılmalıdır. Bu ilin yayında Səbail rayon İcra Hakimiyyətinin başçısı Vüqar Zeynalov məhhəllə sakinləri ilə keçirdiyi görüşdə, bizim bir çox həlli mümkün problemlərimizi həll etməyə söz versə də, onlar öz həllini tapmamış qaldı. Həmin problemlərin içərisində “Jurnalist binaları”nın qarşısındakı işiqforun yaşıl işığın yanması vaxtının 15 saniyədən 30 saniyəyə qaldırılmaq məsələsi, dayanacaqda avtobus kartlarına pul yükləmək üçün “BAKI KART” və “Million” aparatı quraşdırılması məsələləri də var idi. Biz Bakı Şəhər İcra hakimiyyətindən və BNA-dan xahiş edirik ki, bu kiçik məsələləri təcili surətdə həll etsinlər”.

Tarix: 27 Noyabr 2019, 18:04

Xəbər lenti